'The Voice SA': Ontmoet #TeamBobby

Abel Knobel was tot onlangs deel van die Afrikaanse manstrio NRG. Die groep se paaie het onlangs geskei en Knobel jaag nou ’n sololoopbaan na.

Chanel Davids het haar sangkuns verfyn op passasierskepe, maar wil nou in Suid-Afrika naam maak.

Chris Werge was baie bly toe Van Jaarsveld omgedraai het. Bobby is immers een van sy helde. Werge is ’n sanger-skrywer van Kaapstad.

Gavin Edwards is al 14 jaar in die bedryf, maar ’n harde leefstyl het gelei tot middelverslawing waarvoor hy rehabilitasie moes ontvang.

Jessica Martins is ’n 18-jarige van Ballito in KwaZulu-Natal wat nog altyd van ’n sangloopbaan gedroom het.

Kim Collins se eerste groot optrede was in die parlement. As ’n enkelouer moes sy destyds haar sangloopbaan op die ys sit, maar sy probeer nou weer.

Lana Crowster het al agtergrondsang vir Josh Groban, Toya Delazy en Arno Carstens gedoen en is ook ’n sangdosent.

Lyle Anthony Volkwyn het al oor die wêreld heen gesing en het in 2008 die aandag getrek op die M-Net-realiteitsreeks 'High School Musical: Spotlight'.

Mbijana Sibisi was eers ’n tandheelkundetegnikus voordat hy heeltyds begin sing het. Hy het Bob Marley se “Redemption Song” in sy oudisie gesing.

Nolene Olivier droom daarvan om ’n groot naam in die Afrikaanse musiekbedryf te word en skryf sedert die ouderdom van 16 haar eie liedjies.

Sumaré van Schalkwyk sing sedert agtjarige ouderdom en is saam met haar ma deel van ’n duo, Die T-sakkiesusters.

Vernon Barnard is met gloukoom gebore en is sedert sesjarige ouderdom heeltemal blind. Hy het Bobby van Jaarsveld in trane gehad tydens sy oudisie.

Xanilee Hammond is deur en deur ’n rocker en werk tans as musikant en as ’n sangdosent vir kinders.

Zoe Mtila is ’n B.Com.-student aan die Nelson Mandela Metropolitaanse Universiteit, maar wil eintlik ’n sanger wees.